يا مرقب بالصبح نطيت راقيك ... ما واحد قبلي خبرته تعلاك
وليت ياذا الدهر ما كثر بلاويك... الله يزودنا السلامة من اتلاك
ياللي على العربان عمت شكاويك... وليت يا دهر الشقا ول مقواك
واليوم هالكانون غادن شبابيك ..تلعب به الارياح من كل شباك
يامالك اسمع جابتي يوم اوصيك ...واعرف ترى يابوك بامرك وانهاك
وصية من والد طامع فيك ...تسبق على الساقه السانه العلياك
اوصيك بالتقوى عساء الله يهديك ...الها وتدركها بتوفيق مولاك
الله بحق اجدادك العز يعطيك ..مرضاته مع ما تمنا من امناك
احفظ دبشك اللي عن الناس مغنيك ...اللي الى بان الخلل فيك يرفاك
وعرف ترى مكة والاها ابناخيك ...لو تطلبه خمسة ملاليم ما عطاك
اجعل دروب المرجلة من معانيك ... واحذر تميل عن درجها بمرقاك
لا تنسدح عنها وتبغيني اعطيك .. جميع ما يكفيك ما حاصل ذاك
ادب ولدك ان كان تبغيه يشفيك ...واستسعفه من بعد مرباه يا لاك
اما سمج وستسمجك عند شانيط ... ويغر من فعله صديقك وشرواك
والا بعد جهله تراه ياذيك .. لو زعلت امه لا تخليه يالاك
واحذر تصنيع كل منهو ذخر فيك .. معروفه لا تنساه واوفه بعرفاك
ترا الصنايع بين الاجواد تشريك ... اليا طمعت بغرسها لا تعداك
واحذر سرور بغبة البحر يرميك ... ولا عنده املس من تشكيك وبكاك
واوف الرجال حقوقها قبل تعنيك ... والا تعتمد بالقول والحق يقفاك
وهرج النميمة والقفا لا يجي فيك ... واياك عرض الغافل اياي واياك
تبدي حديث للملا فيه تشكيك ... وتهيم عند الناس بالكذب وشراك
واليا نويت احذر تعلم بطاريك ... كم واحد تبغي منه عرف وغواك
واحذر شماتة صاحب لك مصافيك ... اليا جرالك جاري قال لولاك
ولا تحسب ان الله قطوع يخليك ... ولاتفرح ان الله على الخلق بداك
الضيف قدم له حين يلفيك ... مما تنوله يا فتى الجود يمناك
اكرم اقباله فانها من شواديك ... وابذل له المجهود ما دام يعناك
احذر تلقي الضيف مقرن علابيك ... خله محب لك صديق اذا جاك
واوصيك زلات الصديق ان عثا فيك ... ما دام يغطاها الشعر فاحتمل ذاك
راعه ولو ما شفت انه يراعيك ... عساك تكسر نيته عن معاداك
واحذر عدوك لو ظهر بي يصافيك ... خلك نبيه وراقبه وين ما جاك
لا تامنه واطلب من الله ينجيك ... ويكفيك ربك شر ذولا وذولاك
شفني انا يا بوك ابامرك ونهيك ... عند التعرض بين الاثنين حذراك
اذا حضرت اطلابة مع شرابيك ... اسع لهم بالصلح والاش يفداك
ابذل لهم بالطيب ربك ينحيك ... والا تجضع الميزان مع ذا ولا ذاك
اما الشهادة فادها ان ادعو فيك ... بين عمود الدين لا عميت ارياك
بالك تماشي واحد لك يرديك ... طالع بني جنسك وفكر بممشاك
رابع اصيل في زمانك بشاكيك .. لاشاف خملاتك عن الناس غطاك
واحذرك عن طرد المقفي حذاريك ... عليك بالمقبل وترك اللي تعداك
ثم العن الشيطان لياه يغويك ... ترى ان تبعته للشرا بيك وداك
واوصيك لا تشكي علينا بلاويك ... انت السبب طرفك اعيونك بيمناك
واعرف ترى ما قد وطا الفعر واطيك ... ولانت اعز من الجماعة هذولاك
المسك يا راسي من الذل واخطيك ... واحذر تكلم يا لساني وحذراك
والطف بجارك وقم دون عانيك ... وافطن لما يعنيك عن ربعة اخواك
ياذيب وان جتك الغنم في مفاليك ... فاكمن لين ان الرعايا تعداك
امنول يا ذيب تفرس باياديك ... واليوم جاذيب عن الفرس عداك
يا ذيب عاهدني وعاهدك مرميك ... مرميك انا يا ذيب لو زان مرماك
والنفس خالف رايها قبل ترميك ... ترى لها الشيطان يرمي بالاهلاك
ومن بعد ذا الا تصحب النذل يعديك ... وعن صحبة الانذاك حاشاك حاشاك
ترى العشير النذل يخلف طواريك ... وانا ارجي انك ما تجي دون اباك
والهقوه انك ما تجي دون اهاليك ... ولا ظن عود الورد يثمر بتنباك
والحر مثلك يستحي يصحب الديك ... وان صاحبه عاعا معاعات الادياك
لا تسمع قول الطرف يوم يلفيك ... بالكذب يقضي حاجته كل ما جاك
من نم لك نم الك ما فيه تشكيك ... ويلاه قد ازرا رفيقك وزراك
عندك حكا فينا وعندي حكا فيك ... واصبحت كارهنا وحنا كرهناك
ماخطاك ما صابك ولو كان راميك ... وللي يصيبك لو تتقيت ما خطاك
مير استمع مني عسى الله يهديك ... انصحك يامالك لك الله المولاك
عندي مظنه ما تمثلتها فيك ... واطلب لك التوفيق من عند مولاك
هذا نص قصيدة ابن شريم رحمه الله التي يوصي بها ابنه:
يا من لعينٍ في محاجيرها شوك ... والقلب به عن لذة النوم تكاك
لا دك في قلبي من الهم داكوك ... جاوبت طربان الحمايم والادياك
عزي لحالك يا عزيز وانا ابوك ... كان الزمان اللي وطاني توطاك
امشي وكني يا عزيز بتابوك ... في حبس جبارٍ تحت حكم الاتراك
على عشيرٍ دونه الباب مصكوك... ما غير امره واتعداه مناك
بابٍ وراه حروس ما هو بمفكوك... ومبرزٍ دونه مكاين وشباك
وبقيت انا في حضرة الوقت مملوك.. دولة زمانٍ بين جاك وتعداك
افهم وصاتي ياعزيز وانا بوك .. دامك صغير وغاية العلم يقراك
تراه ما ينفعك خالك ولا خوك .. لا صار ما تقضي لزومك بيمناك
وربعك الى بان الخلل فيك عافوك ... اقرب قريبٍ لك من الناس يشناك
ان كثر مالك صدقوا لك وطاعوك ... وان قل ما بيديك شانت سجاياك
لو تطلب الما عندهم كان ما اسقوك .. ابعد مزارك عن وطنهم ومرباك
ان جاد حظك صدقوا لك وزاروك .. وان بار كلٍ ما يبي غير فرقاك
والى اعترض لك من صروف النيا صوك .. كلٍ تبرا منك ما هو بوياك
وهراجة المجلس الى جيت وروك .. منازل تطرب نظيرك بدنياك
والى قضوا منك اللوازم وخلوك ... تفرقوا وانت احتمل كل ما جاك
كنك سراج البيت للنور شبوك ... والى قضى الوارد حدا الربع طفاك
والا كما ليمونة الحمض مصوك ... والى قضى منه الطعم فرغوا لذاك
واللي يجي من رفقته ريب وشكوك ... احذر عنه لياك تصدق بمسراك
والى جفوك اهل الوطن واستخفوك ... قلّع غريسك منه واهدم ركاياك
تراك لو تنجع على الرجل صعلوك .. احسن من اللي تلتجي له وياطاك
عطهم وضيايفهم الى منهم جوك .. وغلّق ضميرك لا تعلم بقصياك
وخدمتك شيخٍ كنك العبد مملوك .. يامرك فيما يشتهي وانت ينهاك
اعرف تراك مبرقعٍ منه مشبوك ... حدّرك في حبل المهالك ولا ارقاك
واصحا لخلان الرخا لو تغالوك .. اعرف ترى اطيبهم الى احتجت يجفاك
كنك خوي مقيط دهووك واغووك ... وحقك عطاك رشاك واقفى وخلاك
واحذر عن العيله ترى الحق مدروك ... مثل العمل يدرك ما منه فكاك
وان كان عدوانك على الضيق حدوك ... اخصم طلابتهم بعجفاك وقداك
وان كانهم لمشرّف الحق ماشوك .. ناظر مطاليع الفرج قبل مبداك
وان طوعوا شيطان الانفس وهانوك .. فاصبر على البلوى ودفنت رزاياك
زرهم تراك الى توانيت زاروك .. اما بديت بصاحب السو يبداك
مادامهم ماطاوعوا لك وعرفوك ... اضرب على الكايد الى عمست ارياك
لو هذبوك من المصايب وضدوك ... ما يذبحونك قبل تدني مناياك
واحلم عن الجاهل ترى الحلم مبروك ... وقم للضعيف اللي من الضيم ينخاك
وادمح خطا جيران بيتك الى اوذوك ... ترى القصير وحرمة الجار بحماك
عطهم رواتب حقهم لو تناسوك ... في كل ما يصلح لدينك ودنياك
وقم للضيوف الى عنوا لك وضافوك ... اغلى كرامتهم حجاجك وبشراك
واعرف ترى ما لك من الضيف مشروك ... لولاه يطلب حاجته فيك ماجاك
وقم للرجال ان ريعوا لك وحبوك ... واحشم خويك واكرمه عند ملفاك
والى اعتبرت بسيرة الناس كفوك ... ما كثر من شي تعبته وعناك
ولا تبات بهم دنياك مضنوك ... ما طاب لك مادام لك وافتهم ذاك
لو يطلبون اخفايك الناس ما اخفوك ... والرجل مثل النجم في كل الافلاك
وصلاة ربي عد الاوراق والشوك ... ما ناض براق وما هل سفاك
على الذي ما فيه ريب ولا شكوك ... محمد مادك بالقلب دكاك
